Алматыда жаңа оқу жылына 11 мың орынға 8 жаңа мектеп ашылды

«Мемлекет басшысының тапсырмасы бойынша „Келешек мектептері“ ұлттық жобасы аясында еліміз бойынша 460 мың оқушы орнына арналған 217 заманауи мектеп салынды. Алматы бұл ауқымды жобаны жүзеге асыруда алдыңғы қатарда», – деді Дархан Сатыбалды.

Бұған дейін Алматыда жалпы сыйымдылығы 24 300 орынға арналған 14 мектеп «Келешек мектептері» жобасы аясында пайдалануға берілді. Бүгін тағы 10 500 оқушы орнына арналған 7 жаңа мектеп, сондай-ақ Зерделі ауданында 550 орындық жалпы білім беретін мектеп ашылды.

Сонымен қатар, реконструкциядан кейін № 160 мектеп қайта ашылды, бұрынғы ғимараттың орнына 340 орынға арналған жаңа интернат мектебі № 15 салынды, сондай-ақ № 112 және № 174 мектептердің қосымша корпустары енгізілді. Осы жобаларды жүзеге асырудың арқасында қалада тағы 1 015 оқушы орны құрылды.

Осылайша, жаңа оқу жылының басталуымен Алматының білім беру инфрақұрылымы жалпы 12 065 жаңа орынмен толықты. Алатау ауданында бүгін 3 жаңа білім беру нысаны ашылды. Оның бірі – «Келешек мектептері» жобасы аясында салынған 2 мың оқушыға арналған № 230 мектеп.

Жаңа оқу жылында 11 496 бала мектеп автобустарымен қамтамасыз етіледі. Бүгін мегаполис білім беру жүйесінде 42 мыңнан астам педагог жұмыс істейді, ал 32 мыңнан астам бірінші сынып оқушылары алғаш рет мектеп табалдырығын аттады.

Дархан Сатыбалды педагогтардың жас ұрпақты тәрбиелеудегі ерекше рөлін атап өтіп, мұғалімдерге өз мамандығына адалдықтары мен күнделікті еңбектері үшін алғыс білдірді. Оқушыларға білімге ұмтылып, үнемі дамып, жаңа идеяларды батыл жүзеге асыруды тіледі.

Қала басшысы балаларды тәрбиелеуде мектеп пен отбасы арасындағы өзара сенім мен бірліктің маңыздылығын атап өтті.