Қазақстандық Чернобыль апатының зардаптарын жоюға қатысқаны үшін ақша өндіріп алды
Талапкер арнайы мемлекеттік жәрдемақы тағайындаудан бас тарту туралы шешімді заңсыз деп тануды және жойуды, сондай-ақ жауапкерді тиісті төлемді тағайындау туралы қолайлы әкімшілік акт қабылдауға міндеттеуді сұрады.
Істі қарау барысында сот талапкердің 1986 жылы 03354 әскери бөлімде «рядовой» әскери шенінде технологиялық рота операторы қызметін атқарғанын анықтады. Әскери бөлімнің орналасқан жері Чернигов облысының Любеч қалашығында болды.
Ашық дереккөздерден алынған мәліметтерге сәйкес, әскери бөлім Чернобыль атом электр станциясынан шамамен 55−60 шақырым қашықтықта орналасқан, бұл талапкердің Чернобыль АЭС-індегі апаттың зардаптарын жоюға қатысу мүмкіндігін растайды.
Талапкер өз дәлелдерін растайтын медициналық құжаттар мен амбулаторлық карталардан үзінділерді ұсынды. Олардың ішінде ол Чернобыль АЭС-індегі апаттың зардаптарын жоюға қатысушы болып табылатыны, бірнеше аурулары бар екені және гамма-сәулеленуді өткергені көрсетілген.
Сонымен қатар, Орал қаласының № 2 сотының және Батыс Қазақстан облыстық сотының азаматтық істер бойынша сот алқасының заңды күшіне енген шешімі талапкердің Чернобыль АЭС-індегі апаттың зардаптарын жоюға қатысу фактісін растайтынын көрсетеді.
Сот талапкердің осы фактілерді анықтау туралы өтінішінің фактілерді қайта растауға бағытталғанын атап өтті, олар тиісті құжаттар мен сот актілерімен расталған.
Әкімшілік істі қарау нәтижесінде сот талапкердің талаптарын қанағаттандырып, арнайы мемлекеттік жәрдемақы тағайындаудан бас тарту туралы шешімді заңсыз деп танып, жауапкерді оның тағайындалуы туралы қолайлы әкімшілік акт қабылдауға міндеттеді.
Сот талапкердің бұзылған құқықтарын тиімді қорғау қажеттілігін ескерді. Сот шешімінің ұзақ уақыт орындалмауы жаңа даулардың туындауына және талапкердің құқықтарының одан әрі бұзылуына әкелуі мүмкін.
Анықталған жағдайларды ескере отырып, сот шешімді дереу орындауға бағыттады.
Осылайша, сот шешімі Чернобыль апатының зардаптарын жоюға қатысушының расталған статусын иеленетін азаматтың құқықтарын нақты және уақтылы қорғауды қамтамасыз етуге бағытталған.
Сот шешімі заңды күшіне енген жоқ.
