Тоқаев Саденовты қабылдады
Ержан Саденов биылғы жылдың тоғыз айында қылмыс 15%-ға, яғни өткен жылдың сәйкес кезеңімен салыстырғанда 11 мыңнан астам қылмысқа төмендегенін хабарлады. Төмендеу ең қауіпті қылмыс түрлері, қоғамдық орындар мен көшелердегі құқық бұзушылықтар, отбасылық-тұрмыстық сала, кәмелетке толмағандар мен бұрын сотталғандар арасында байқалады.
«Өткен жылдардағы 2,5 мыңнан астам қылмыс ашылды. Қазіргі заманғы криминалистикалық құралдар, оның ішінде ДНК-зерттеулер, көп жылдық қылмыстарға қатысы бар адамдарды анықтауға мүмкіндік береді», – делінген хабарламада.
Ішкі істер министрлігінің мәліметтері бойынша, жыл басынан бері азаматтардың, волонтерлер мен қоғамдық көмекшілердің хабарламалары бойынша 12 мыңнан астам әкімшілік құқық бұзушылықтар тоқтатылды және 357 қылмыс ашылды.
Сондай-ақ, Саденов шетелдік құқық қорғау органдарымен өзара әрекеттесу туралы айтты. Қазақстаннан тыс жерде 1039 іздеуде жүрген адамның орналасқан жері анықталды, 154 іздеуде жүрген адам ұсталды. Шетел мемлекеттерінің сұрауымен Қазақстанда 537 қылмыскер анықталып, ұсталды.
Министр сондай-ақ ІІМ-нің тергеп жатқан қылмыстық істер бойынша залалды өтеу туралы баяндады. Жыл басынан бері 49 миллиард теңге өтелді, бұл өткен жылдың сәйкес кезеңімен салыстырғанда 22,5%-ға көп. Осы сомадан 6,5 миллиард теңгеден астамы интернет-алаяқтықтан зардап шеккендерге қайтарылды.
Интернет-алаяқтық саны 21%-ға төмендеді. Оларды тоқтату үшін 8,7 мың алаяқтық және фишингтік сайттар бұғатталды, 187 миллион алаяқтық қоңыраулардың алдын алды.
ІІМ қоғамдық қауіпсіздікті қамтамасыз ету үшін цифрлық құралдарды да дамытып жатыр. Бейнебақылау жүйесінің көмегімен 2,2 мыңнан астам адам анықталып, ұсталды.
Цифрлық шешімдер жолдардағы қауіпсіздікті арттыру үшін де қолданылады. Профилактиканы күшейту шараларымен бірге бұл шаралар жол-көлік оқиғаларының санын 5%-ға төмендетуге ықпал етті. Жол апаттарында қаза тапқандар саны 16%-ға, жарақат алғандар – 7%-ға азайды.
Кездесудің қорытындысы бойынша мемлекет басшысы құқық тәртібі мен қоғамдық қауіпсіздікті одан әрі арттыру бойынша бірқатар тапсырмалар берді.
