Тоқаев пен Мерц БАҚ үшін брифинг өткізді

Президент Германияның Қазақстанның Еуропадағы сенімді стратегиялық серіктесі екенін және Қазақстанның тәуелсіздігін алғаш таныған елдердің бірі екенін атап өтті.

«Келесі жылы екі мемлекет арасындағы дипломатиялық қатынастардың орнағанына 35 жыл толады. Осы кезеңде біздің серіктестігіміз барлық деңгейде табысты дамып келеді. Сауда-экономикалық, инвестициялық және мәдени-гуманитарлық байланыстар нығайды. Сәйкес құқықтық база қалыптасты. Халықаралық ұйымдар шеңберінде өзара іс-қимыл кеңейді. Өзара құрмет пен қолдауға негізделген ынтымақтастығымыз алдағы уақытта да табысты болады деп сенемін», – деді ол.

Келіссөздердің қорытындысын шығара отырып, мемлекет басшысы Германия Федералды канцлерімен кездесулер барысында маңызды келісімдерге қол жеткізілгенін атап өтті.

Президенттің айтуынша, бүгінгі өткен кездесулер мазмұнды өтті және нақты нәтижелерге қол жеткізуге мүмкіндік берді.

«Келіссөздер барысында жалпы сомасы шамамен 2 миллиард долларды құрайтын 30-дан астам коммерциялық құжатқа қол қойылды. Бұл келісімдердің тиімді жүзеге асырылуы екі ел арасындағы ынтымақтастықты одан әрі нығайтады. Ертең мен Баварияға барып, бірқатар жоғары лауазымды тұлғалармен кездесуді жоспарлап отырмын. Визит барысында мен Қазақстан-Бавария технологиялық форумына қатысамын. Бұл кездесудің де біздің елдеріміздің серіктестігін нығайтуға ықпал ететініне сенемін», – деді ол.

Келіссөздер барысында тараптар өңірлік және халықаралық күн тәртібіндегі өзекті мәселелерді де талқылады.

«Біз кез келген конфликтіні бейбіт және дипломатиялық жолмен шешу қажет деп есептейміз. Бұл біздің елдердің ортақ ұстанымы. Сонымен қатар, біз «Орталық Азия – Германия» форматында диалогты одан әрі дамытуға келісім жасадық. Қазақстан Германиямен ұзақ мерзімді, өзара тиімді және нақты нәтижелерге бағытталған стратегиялық серіктестікті нығайтуға ниетті», – деп қорытындылады Тоқаев.

Содан кейін Қазақстан Президенті мен Германия канцлері журналистердің сұрақтарына жауап берді.

«Біз өткен жолды жоғары бағалаймыз. Белгілі болғандай, жолды жүріп өткен адам ғана біледі. Біз қиын жолдан өттік, үлкен жетістіктерге жеттік. Германия біздің елде үлкен құрметке ие. Біз бұл елді жақсы көреміз және құрметтейміз, оның жетістіктерін, ең алдымен, экономикада, сондай-ақ басқа да салаларда лайықты бағалаймыз. Германия – халықаралық аренада өте беделді мемлекет. Сондықтан мен үлкен үмітпен, жаңа келісімдерге қол жеткізу үшін келдім. Біз бұл келісімдерге қол жеткіздік, енді оларды жүзеге асыру міндеті тұр. Сондықтан менің болашаққа көзқарасым өте оң. Біз одан да үлкен жетістіктерге жетеміз деп толық сенемін. Мен келіссөздер барысында Германия канцлері Мерцтің келер жылы өзіне ыңғайлы уақытта мемлекеттік сапармен келуін күтіп отырғанымызды айттым», – деді мемлекет басшысы Қазақстан мен Германия арасындағы ынтымақтастықтың сипатына баға беру туралы сұраққа жауап бере отырып.