Швейцария Қазақстанда тұрақты әуе рейстерін іске қосуды жоспарлап отыр
Бұл ақпарат екі мемлекеттің авиациялық билігі арасындағы келіссөздердің қорытындысы бойынша жарияланды.
«Швейцариялық тарап екі ел арасындағы тікелей әуе байланысын дамытуда перспективаларды көріп отыр және қазіргі уақытта Қазақстанға тұрақты рейстерді ашу мүмкіндігін қарастыруда.
Қазақстан мен Швейцария арасындағы тікелей әуе байланысының дамуы екі ел арасындағы туристік, сауда-экономикалық және іскерлік байланыстарды нығайтуға, сондай-ақ өзара жолаушылар мен іскерлік ағындарды арттыруға қосымша мүмкіндіктер туғызады», – делінген хабарламада.
Рейстерді іске қосу үшін тараптар өзара түсіністік туралы меморандумға қол қойды.
Құжат тағайындалған әуе компанияларына аптасына 28 жолаушы рейсін орындау құқығын қарастырады.
«Тараптар сондай-ақ әуе байланысы туралы келісім жобасының мәтінін келісіп, парафирледі, бұл Қазақстан мен Швейцария арасындағы әуе байланысын одан әрі дамыту үшін жаңартылған құқықтық негізді қалыптастырады», – деп қосты ведомство.
