Мемлекетке 30,1 млрд теңге 66,5 млрд теңге зияннан қайтарылмаған
«Прокуратура органдары жүйелі түрде мемлекетке қылмыстармен келтірілген өтелмеген зиян фактілерін анықтау, сондай-ақ бюджетке ақша қаражаттарын нақты қайтаруды қамтамасыз ету бойынша жұмыс жүргізуде…» — деп хабарлады бақылаушы орган.
66,5 млрд теңге жалпы зияннан 30,1 млрд теңге өндірілмеген күйінде қалып отыр.
«Қалыптасқан жағдайдың негізгі себептерінің бірі уәкілетті мемлекеттік органдардың мемлекетке келтірілген зиянды өндіріп алу туралы талап арыздарын ұсынбауы», — деп атап өтті Бас прокуратурада.
Прокурорлар алты ұсыныс, үш наразылық білдіріп, жалпы сомасы 30,1 млрд теңге болатын 27 талап арызын ұсынды.
Мемлекет кірісіне 651 млн теңге қайтарылды. Қалған зиян сомалары бойынша талап арыздар қаралуда.
Мысал ретінде Қызылорда облысындағы іс қарастырылуда. Екі азамат, ақпараттық жүйеге жалған мәліметтер беріп, 63 автокөліктің техникалық құжаттарына өзгерістер енгізді. Нәтижесінде бюджетке 16 автокөлік бойынша 115,3 млн теңге кедендік төлемдер, сондай-ақ 63 автокөлік үшін 460,6 млн теңге бастапқы мемлекеттік тіркеу алымдары түспеді.
Прокуратураның араласуынан кейін уәкілетті орган сотқа жүгінді, нәтижесінде мемлекет пайдасына 575,9 млн теңге өндірілді.
Бұған дейін Қазақстанда мемлекет басқаруына өткен заңсыз алынған активтерді қайтару аясында мүліктер аукционға қойылды. Бұл тізімге элиталық жылжымайтын мүлік, сәнді зергерлік бұйымдар, сағаттар коллекциясы және тұтас компания кірді.
