Тоқаев Жоғарғы соттың төрағасы Мергалиевпен кездесті
«Асламбек Мергалиев соттар 24,8 мың қылмыстық істі қарағанын хабарлады. Азаматтық істер саны 28,4%-ға өсіп, 605 мыңнан асты. Бұл банкроттық, тұрғын үй және жер даулары, шарттық міндеттемелер бойынша талаптардың көбеюімен байланысты. Сонымен қатар, 29,2 мың әкімшілік іс және 319 мың әкімшілік құқық бұзушылықтар туралы іс қаралды», – деп жазады Ақорда.
Сондай-ақ, даулардың жартысынан көбі медиация және басқа баламалы рәсімдер арқылы шешілгені атап өтілді.
Кассациялық соттарға 18 мыңнан астам шағым түсті. Оларды қарау нәтижесінде апелляциялық инстанцияның түзетілген сот актілерінің саны екі есе артты – 934-тен 1 704-ке дейін.
«Осы орайда, Ұлттық статистика бюросының деректеріне сәйкес, сот жүйесіне абсолютті сенім деңгейі 2023 жылы 55,2%-дан қазіргі уақытта 69,7%-ға дейін өсті», – делінген хабарламада.
Мергалиев мемлекет басшысына сот жүйесінің кадрлық қамтамасыз етілуі туралы да ақпарат берді.
Президент құқық қорғау сапасын одан әрі арттыру және сот жүйесін модернизациялау шараларын жүзеге асыру қажеттілігін атап өтті.
