Қазақстанда мектеп оқушыларына қандай жалақы ұсынылады
Қазақстанда еңбек келісімшарты жалпы ереже бойынша 16 жастан бастап жасалатынын атап өткен жөн.
Алайда заңнамада ерекшеліктер қарастырылған:
- 15 жастан бастап — негізгі орта немесе жалпы орта білім алғаннан кейін;
- 14 жастан бастап — оқу уақытынан тыс жеңіл жұмыстарды орындау үшін, егер ол денсаулыққа зиян келтірмесе және оқуға кедергі жасамаса;
- 14 жасқа дейін — кинематография, театр, концерттік ұйымдар мен цирктерде шығармашылық жұмыстарға қатысу үшін.
Жасөспірімдер үшін жұмыс уақыты мен орындалатын жұмыстардың түрлері бойынша шектеулер де белгіленген. Атап айтқанда, оларға ауыр еңбекке, зиянды немесе қауіпті жағдайларда жұмыс істеуге және денсаулыққа немесе моральдық дамуға зиян келтіретін басқа да жұмыстарға тартуға тыйым салынады. Қазақстанда жасөспірімдер сауда, қоғамдық тамақтандыру, қызмет көрсету және аумақтарды абаттандыру саласында жұмыс таба алады.
Сарапшылардың айтуынша, ұсынылатын жалақы лауазымға байланысты және айына 85 мыңнан 380 мың теңгеге дейін болуы мүмкін. Мысалы, гардеробшы лауазымына арналған вакансияларда жалақы 85−130 мың теңге аралығында. Уборщиктерге 90 мың теңгеден, тәрбиешінің көмекшілеріне 100−160 мың теңге аралығында ұсынылады. Официанттарға 100−300 мың теңге, ал кассирлерге 100−380 мың теңге жалақы ұсынылады. Консультанттар мен курьерлердің жалақысы 150 мың теңгеден басталады. Жасөспірімдер сондай-ақ жарнамалық түсірілімдер мен кино- және модельдік жобаларға қатысу арқылы ақша таба алады.
Жарияланған хабарландыруларда музыкалық бейнебаян түсіру үшін 15 мың теңгеден 40−70 мың теңгеге дейінгі бір реттік гонорарлар кездеседі. Сондай-ақ, мектеп оқушылары қысқа бейнелерді монтаждау және әлеуметтік желілерді жүргізу жұмыстарымен айналыса алады.
Кейбір вакансияларда қарапайым видеомонтаж үшін айына шамамен 50 мың теңге, ал SMM үшін шамамен 100 мың теңге ұсынылады. Алайда, барлық ұсыныстар кәмелетке толмағандарға қолжетімді емес.
