Қазақстан 2027 жылы мұнайдан қанша табыс табуды жоспарлап отыр

Келесі орта мерзімді кезеңде ЖІӨ-нің орташа жылдық өсу қарқыны 5,4% құрайды. 2027 жылы номиналды ЖІӨ 199,3 трлн теңгеден 2029 жылы 245 трлн теңгеге дейін өседі, ал 2027 жылға арналған жылдық инфляцияның мақсатты коридоры 7,5−9,5% аралығында, 2028–2029 жылдары 6−8% болып белгіленді.

«2027 жылға арналған мұнай секторындағы ұйымдардан Ұлттық қорға түсетін түсімдер болжамы 96 млн тонна мұнай өндіру көлемі, мұнайдың әлемдік бағасы 70 доллар/баррель, теңгенің АҚШ долларына қатысты курсы 480 теңге негізінде есептелді және 3 781,8 млрд теңгені құрайды, яғни 2026 жылғы бағалаудан 342 млрд теңгеге аз. 2027 жылға арналған республикалық бюджет кірістерінің болжамы трансферттерді ескермей 19,9 трлн теңге көлемінде анықталды, яғни ағымдағы жылдың бағалауымен 116,4% құрайды, 2,8 трлн теңгеге артық. 2028 жылға арналған республикалық бюджет кірістерінің болжамы трансферттерді ескермей 21,7 трлн теңге көлемінде, 2027 жылға арналған болжаммен салыстырғанда 1,7 трлн теңгеге, яғни 9%-ға артады, 2029 жылға 23,3 трлн теңге, 2028 жылмен салыстырғанда 1,6 трлн теңгеге, яғни 7,6%-ға артады», — делінген қорытындыда.

2027 жылғы республикалық бюджет кірістерінде ең үлкен үлес (98,0%) салықтық түсімдерге тиесілі, оның ішінде 48,8% қосылған құн салығына, 31,8% корпоративтік табыс салығына келеді. Салықтық емес түсімдер 377 млрд теңге көлемінде анықталды, арнайы түсімдер — 18 млрд теңге.

2027 жылы трансферттер бойынша түсімдер 5,5 трлн теңге, 2028 жылы — 5,3 трлн теңге, 2029 жылы — 4,9 трлн теңге көлемінде болжануда.

2027 жылға арналған Ұлттық қордан трансферттер көлемі 4,4 трлн теңге, 2028 жылға — 3,9 трлн теңге, 2029 жылға — 3,5 трлн теңге болады.

2027−2028 жылдарға арналған кепілдендірілген трансферт көлемі жыл сайын 2,4 трлн теңгені құрайды, ал 2029 жылы — 2 трлн теңге. Бұл қаражаттар маңызды объектілер мен республикалық маңызы бар жобаларды қаржыландыруға бағытталады.

Бюджет шығыстарының басым бағыттары мемлекеттік әлеуметтік міндеттемелерді толық көлемде орындау, ғылым, білім, медицина саласындағы адам капиталына қолдау көрсету арқылы дамыту болып қала береді.

2027 жылы республикалық бюджет шығыстарының жалпы көлемі 30,2 трлн теңге, 2028 жылы — 29,4 трлн теңге, 2029 жылы — 29,6 трлн теңге көлемінде жоспарлануда.

2027 жылы негізгі бюджет шығыстары адам капиталына, әлеуметтік көмек пен қамтамасыз етуге, денсаулық сақтау, білім беру және ғылымды дамытуға, борышты қызмет көрсетуге және өңірлерді қолдауға бағытталады.

Бұған дейін біз Қазақстанның тоғыз өңірі табыс жоспарын орындамағанын жазған болатынбыз.