Қазақстандықтарға телефон қоңыраулары мен хабарламалар арқылы алаяқтық туралы ескертілді
Салық органдары телефон арқылы «тапсырылмаған декларация», «есептіліктегі қателіктер», «тергеу» немесе «банктік шоттарды дереу бұғаттау» туралы хабарламайды. Олар WhatsApp, Telegram, таныс емес нөмірлер арқылы мұндай хабарламаларды жібермейді және «мәселені шұғыл шешуді» немесе сыртқы сілтемеге өтуге ұсыныс жасамайды.
«Мемлекеттік кірістер органдарының ресми хабарламалары тек kgd.gov.kz және eGov.kz порталдарындағы салық төлеушінің кабинеті арқылы, сондай-ақ электрондық құжат айналымы жүйесі арқылы келеді. Міндеттемелер, хабарламалар мен қарыздардың бар-жоғын жеке кабинетте, e-Salyq Azamat және e-Salyq Business қосымшаларында өзіңіз тексере аласыз», — деп ескертті ведомство.
Егер хабарлама заңмен белгіленген мерзімде орындалмаса, өндіріп алу шаралары Салық кодексінде көзделген тәртіппен жүзеге асырылады, телефон қоңырауы бойынша емес.
«Егер сізге салық органдарының қызметкерлері ретінде танысқан белгісіз адамдар телефон шалса және код, пароль немесе ЭЦП деректерін атауды сұраса — әңгімені дереу тоқтатыңыз. Жіберілген сілтемелерге өтпеңіз және олардың нұсқауымен қосымшаларды орнатпаңыз», — деп хабарлады Маңғыстау облысы бойынша мемлекеттік кірістер департаменті.
2026 жылдың 10 қыркүйегінде Бас прокуратура қазақстандықтарды жаңа алаяқтық схемасы туралы ескертті: алаяқтар eGov қызметкерлері ретінде танысады. Тек соңғы айда елде осындай 30-ға жуық факт тіркелді.
