Ғылым министрі болып Саясат Нурбек тағайындалды
«Нурбек Саясатты Қазақстан Республикасының ғылым және жоғары білім министрі етіп тағайындау», — делінген Ақорда баспасөз қызметінің ресми жарияланымында.
Саясат Нурбек 1981 жылдың 18 мамырында Семей қаласында дүниеге келген. Ол Қазақстан мен шетелдегі оқу орындарында жан-жақты білім алған: АҚШ-тың Маршаллтаун колледжін «саясаттану» мамандығы бойынша, Л.Н. Гумилев атындағы Еуразия ұлттық университетін «Халықаралық құқық» мамандығы бойынша (2004), Италияның La Sapienza университетінің магистратурасын геосаясат магистрі дәрежесімен, «Кокше» академиясын психология бакалавры дәрежесімен тәмамдаған.
Еңбек жолын студенттік жылдарында бастаған. АҚШ-тағы тәжірибеден өту кезінде Конгреске сайлау науқанында жұмыс істеп, президенттік науқанға қатысқан.
2000–2001 жылдары Конгрессмен Марк Смиттің көмекшісі және Айова штатының (АҚШ) үкіметінде жұмыс істеді.
2002–2004 жылдары Қазақстанның жастар саясатын жүзеге асыруға белсене қатысты.
2006–2008 жылдары «ФУР „Казына“» акционерлік қоғамында жұмыс істеді.
2008 жылы Қазақстан Республикасының президенті әкімшілігінің кадр саясаты бөлімінің сектор меңгерушісі, сондай-ақ ҚР Президенті жанындағы мемлекеттік басқару академиясының халықаралық ынтымақтастық жөніндегі доценті және проректоры болды.
2008–2009 жылдары «ФНБ’Самрук-Казына» акционерлік қоғамының кадрлық жұмыс және персоналды басқару департаментінің атқарушы директоры, кейін директоры болып жұмыс істеді.
2009–2010 жылдары Қазақстан Республикасының президенті жанындағы мемлекеттік басқару академиясының мемлекеттік саясат ұлттық мектебін басқарды.
2010 жылдан 2013 жылға дейін «Халықаралық бағдарламалар орталығы» акционерлік қоғамының президенті болды.
2013–2015 жылдары «Нұр Отан» Халықтық-демократиялық партиясының Қоғамдық саясат институтының директоры болды.
2016–2017 жылдары АХҚО-ның басқарушы директоры лауазымын атқарды.
2018–2022 жылдары BTS Digital білім беру жобаларын басқарды, BTS Education компаниясының бас директоры болды.
2022 жылдың 25 ақпанынан 14 маусымына дейін ҚР Парламенті Мәжілісінің депутаты болды.
2022 жылдың 11 маусымында ҚР президентінің жарлығымен ғылым және жоғары білім министрі болып тағайындалды.
