Эльвира Азимованы Қазақстан Республикасының Конституциялық сотының төрағасы етіп қайта тағайындау
Эльвира Азимова туралы не белгілі
Ол 1973 жылдың 15 ақпанында дүниеге келген.
1996 жылы Х. А. Яссауи атындағы халықаралық қазақ-түрік университетін «Халықаралық құқық маманы» мамандығы бойынша тәмамдаған.
Еңбек жолын Шымкент қаласындағы Дзержинск аудандық ішкі істер басқармасының диспетчері қызметінен бастаған.
Қазақстан Республикасының әділет министрлігінде 1996 жылдан 1999 жылға дейін халықаралық құқықтық қамтамасыз ету басқармасының жетекші және бас консультанты болып жұмыс істеді.
Содан кейін 1999 жылдан 2005 жылға дейін әділет министрлігінің заңнама, халықаралық құқық және протокол департаменттерінде әртүрлі басшылық қызметтер атқарды.
2005 жылдан 2010 жылға дейін әділет министрлігінің заңдық актілер және халықаралық құқық, мемлекеттік мүліктің құқықтарын қорғау, келісімдер мен талап-арыз жұмыстары департаментін басқарды.
2010 жылдан 2013 жылға дейін әділет министрлігінің халықаралық келісімдер сараптамасы департаментінің директоры болып жұмыс істеді.
2013 жылдан 2019 жылға дейін әділет министрінің орынбасары қызметін атқарды.
2019 жылдан 2022 жылға дейін Қазақстан Республикасындағы адам құқықтары жөніндегі уәкіл болды.
2021 жылы Президент жанындағы адам құқықтары жөніндегі комиссияның мүшесі, ал 2022 жылы Президент жанындағы әйелдер және отбасылық-демографиялық саясат жөніндегі ұлттық комиссияның мүшесі болды.
2023 жылдың 1 қаңтарынан Қазақстан Республикасының Конституциялық сотының төрағасы қызметіне тағайындалды.
