Алматыдағы жалға берілетін пәтерлерді тексеру: субаренда және заңсыз тұрғындар анықталды
«Мониторинг нәтижесінде 172 заңсыз тұрғын үйді үшінші тұлғаларға беру фактісі анықталды. 114 жағдайда пәтерлер босатылды, қалған 58-іне сотқа дейінгі талаптар жіберілді», — деп хабарлайды Алматы қаласы әкімдігінің баспасөз қызметі.
Тексеру барысында пәтерлерді субарендаға беру, келісімшартта көрсетілмеген тұлғалардың тұруы, сондай-ақ жалға алу шарттарын бұзу жағдайлары анықталды.
Қазақстан Республикасының «Тұрғын үй қатынастары туралы» Заңының 24-бабының 3-тармағына сәйкес, жергілікті атқарушы органмен берілген тұрғын үйді жалға алушылар субарендаттарды және уақытша тұрғындарды орналастыруға құқығы жоқ. Жалға берілетін тұрғын үйді субарендаға немесе үшінші тұлғаларға беру жалға алу келісімшартын бұзуға негіз болып табылады.
Босатылған пәтерлерде қазір жөндеу-қалпына келтіру жұмыстары жүргізілуде. Оларды аяқтағаннан кейін тұрғын үй әлеуметтік осал топтағы азаматтарға, жалға алу тұрғын үйіне мұқтаж ретінде есепте тұрғандарға беріледі.
