50-ден астам күдікті Қазақстанның 10 өңірінде бопсалаушылық үшін ұсталды
Тінту кезінде күдіктілерден атыс және суық қару, оқ-дәрілер, сондай-ақ бірнеше қымбат автокөліктер табылып, тәркіленді.
Ұстап алу шаралары Астанада, Шымкентте, сондай-ақ Ақтөбе, Атырау, Абай, Ақмола, Шығыс Қазақстан, Батыс Қазақстан, Қарағанды және Маңғыстау облыстарында өтті, деп хабарлады полиция.
«Жалпы, аталған фактілер бойынша 50-ден астам адам қылмыстық жауапкершілікке тартылды. Заңсыз айналымнан 10-нан астам атыс және травматикалық қару, сондай-ақ оқ-дәрілер тәркіленді», — делінген хабарламада.
Қабылданған шаралардың нәтижесінде жәбірленушілердің 77 миллион теңгеден астам ақша қаражатын иемдену әрекеті алдын алынды.
«Қылмыстық істер бойынша қажетті тергеу әрекеттері жүргізілуде. Сонымен қатар, қылмыстық қызметке қатысы бар басқа тұлғаларды анықтау және жауапкершілікке тарту шаралары қабылдануда», — деп хабарлады ҚР ІІМ ұйымдасқан қылмысқа қарсы күрес департаментінің өкілі Қуандық Алпыс.
Ол криминалдық топтарды уақытында анықтауға, олардың қызметін тоқтатуға және жаңа құқық бұзушылықтардың алдын алуға ерекше назар аударылатынын айтты.
