Жаздың соңғы күндеріндегі ауа райы: Қазақстанда аяз бен жаңбыр

«29 тамызда Ақмола, Қостанай және Қарағанды облыстарында қатты жаңбыр күтілуде. 30-31 тамызда Павлодар және Шығыс Қазақстан облыстарында жаңбыр болжануда. Тек елдің батысында жауын-шашынсыз ауа райы күтілуде. Батыста, солтүстік-батыста, солтүстікте және шығыста түнде және таңертең тұман болуы мүмкін», — деп хабарлайды «Қазгидромет».

Қазақстанның батысында күндіз ауа температурасы 18−23°-тан 25−30°-қа дейін өзгеріп отырады. Маңғыстау облысында айтарлықтай өзгерістер күтілмейді: күндіз температура 25−35° болады.

Солтүстік-батыста, солтүстікте және елдің орталығында температураның төмендеуі күтілуде: түнде 10−15°-тан 0−5°-қа дейін. Периодтың соңында кей жерлерде 3 градусқа дейін аяз болуы мүмкін, ал күндіз температура 15−25°-тан 10−15°-қа дейін өзгеріп отырады.

Елдің шығысында да температураның төмендеуі болжануда. Түнде температура 10−15°-тан 5−10°-қа дейін, ал күндіз 25−35°-тан 15−25°-қа дейін болады.

Қазақстанның оңтүстік өңірлерінде температуралық фон түнде 10−20° және күндіз 25−35° деңгейінде болады.