Қазақстандағы учаскелік сайлау комиссияларының жұмысының басталуы

«10 400-ден астам сайлау учаскелері ашылды. Сайлауды ұйымдастыруға 10 600-ден астам комиссия тартылатын болады, жалпы мүшелер саны 71 мың адамды құрайды. 4-17 тамыз аралығында Орталық сайлау комиссиясының мүшелері мен аппарат қызметкерлерімен бірге еліміздің 20 өңіріне инспекциялық сапарлар жасаймыз. Сайлау учаскелерінің дайындығы, материалдық-техникалық жабдықталуы, сайлаушыларды ақпараттандыру бойынша жұмыс ұйымдастыру, call-орталықтардың қызметі бағаланады. Сонымен қатар, өңірлерге инспекциялық сапарлар барысында аумақтық сайлау комиссияларының жұмысына, оның ішінде сайлау комиссиялары мүшелерінің оқыту барысына ерекше назар аударылады», – деді Нұрлан Абдиров.

Оның айтуынша, 7 тамыздан бастап әр сайлаушы өз деректерін дауыс беруге құқығы бар азаматтар тізімінде тексере алады. Қателер анықталған жағдайда учаскелік сайлау комиссиясына дереу жүгіну мүмкіндігі болады. Мұндай өтініштер келіп түскен күні қаралады.

Нұрлан Абдиров сондай-ақ, осы аптадан бастап Орталық сайлау комиссиясының мүшелері өңірлерге инспекциялық сапарлармен шығатынын хабарлады. Олар барлық облыстар мен республикалық маңызы бар қалаларды сайлауға дайындық инфрақұрылымын тексеру үшін аралайды.

Сонымен қатар, отырыста еліміз бойынша сайлаушылар тізіміне 12 605 788 азамат енгізілгені атап өтілді. Ең көп сайлаушылар Астана мен Алматыда, сондай-ақ Түркістан және Алматы облыстарында тіркелген.

Бұған дейін Бас прокуратура сайлау алдында қазақстандықтарға маңызды үндеу жасады.